na chilmanon ki hasin sarsarahaTen hongi

na chilmanoñ kī hasīñ sarsarāhaTeñ hoñgī

na hoñge ham to kahāñ jagmagāhaTeñ hoñgī

maiñ ek bhañvrā tire baaġh meñ rahūñ na rahūñ

kise nasīb mirī gungunāhaTeñ hoñgī

kivāḌ band karo tīra-baḳhto so jaao

galī meñ yuuñ hī ujāloñ kī āhaTeñ hoñgī

na pūchh pā.eñge ahvāl-e-bebasī vo bhī

mire laboñ pe agar kapkapāhaTeñ hoñgī

lahū nichoḌ lo mumkin hai kal bahār ke baad

ragoñ meñ phailī huī sansanāhaTeñ hoñgī

vo din bhī aa.egā 'bekal' chaman ke phūloñ par

ba-nām-e-jurm-o-ḳhatā muskurāhaTeñ hoñgī

na chilmanon ki hasin sarsarahaTen hongi

na honge hum to kahan jagmagahaTen hongi

main ek bhanwra tere bagh mein rahun na rahun

kise nasib meri gungunahaTen hongi

kiwaD band karo tira-baKHto so jao

gali mein yun hi ujalon ki aahaTen hongi

na puchh paenge ahwal-e-bebasi wo bhi

mere labon pe agar kapkapahaTen hongi

lahu nichoD lo mumkin hai kal bahaar ke baad

ragon mein phaili hui sansanahaTen hongi

wo din bhi aaega 'bekal' chaman ke phulon par

ba-nam-e-jurm-o-KHata muskurahaTen hongi