na de saqi mujhe kuchh gham nahin hai

na de saaqī mujhe kuchh ġham nahīñ hai

ye kulhaḌ koī jām-e-jam nahīñ hai

vo rū-e-ḳhashmgīñ kuchh kam nahīñ hai

na ho gar haath meñ ballam nahīñ hai

bas ik bahr-e-banī-ādam nahīñ hai

jahāñ meñ varna gehūñ kam nahīñ hai

naqāb ulTī hai ye kah kar kisī ne

ki ab to koī nā-mahram nahīñ hai

hazāroñ chāhne vaale haiñ un ke

kam un kī aaj kal income nahīñ hai

jasāmat kah rahī hai ye kisī kī

koī shai aur juz balġham nahīñ hai

mudāvā kyā ho hirs-e-rāhbar kā

kahīñ is zaḳhm kā marham nahīñ hai

bane to saikḌoñ aa.iin lekin

kisī aa.iin meñ kuchh dam nahīñ hai

kahāñ rahbar meñ jauhar rahbarī ke

ki paanī hī to hai zamzam nahīñ hai

hamārī jur.atoñ kī daad detā

magar ab kyā kareñ rustam nahīñ hai

adā.eñ kuchh to un meñ aaj kī haiñ

magar puurā abhī koram nahīñ hai

likhā hai bazm-e-ishrat meñ jo har-sū

naved-e-ġham hai vo welcome nahīñ hai

sivā.e makr-o-kaid o hirs o fitrat

mohabbat kā yahāñ system nahīñ hai

mohabbat meñ tasanño ho to samjho

vo lauñDī hai koī begam nahīñ hai

jise samjhī hai sāda-lauh duniyā

hai behad kā.iyāñ būdam nahīñ hai

nazar aate haiñ jo qatre guloñ par

kisī kī raal hai shabnam nahīñ hai

zamīn o āsmāñ larzāñ haiñ jis se

mire naale haiñ atom-bomb nahīñ hai

nazar aatā nahīñ vo rū-e-rañgīñ

kahīñ bāzār meñ shaljam nahīñ hai

kahāñ aurat nahīñ hai sar-barahna

kahāñ ab parde kā mātam nahīñ hai

fareb-e-hazrat-e-vā.iz na pūchho

ibārat saaf hai mub.ham nahīñ hai

churā leñ jis ko duzdīda nigāheñ

ye dil vo dilrubā ḳhānam nahīñ hai

na de saqi mujhe kuchh gham nahin hai

ye kulhaD koi jam-e-jam nahin hai

wo ru-e-KHashmgin kuchh kam nahin hai

na ho gar hath mein ballam nahin hai

bas ek bahr-e-bani-adam nahin hai

jahan mein warna gehun kam nahin hai

naqab ulTi hai ye kah kar kisi ne

ki ab to koi na-mahram nahin hai

hazaron chahne wale hain un ke

kam un ki aaj kal income nahin hai

jasamat kah rahi hai ye kisi ki

koi shai aur juz balgham nahin hai

mudawa kya ho hirs-e-rahbar ka

kahin is zaKHm ka marham nahin hai

bane to saikDon aain lekin

kisi aain mein kuchh dam nahin hai

kahan rahbar mein jauhar rahbari ke

ki pani hi to hai zamzam nahin hai

hamari juraton ki dad deta

magar ab kya karen rustam nahin hai

adaen kuchh to un mein aaj ki hain

magar pura abhi koram nahin hai

likha hai bazm-e-ishrat mein jo har-su

nawed-e-gham hai wo welcome nahin hai

siwae makr-o-kaid o hirs o fitrat

mohabbat ka yahan system nahin hai

mohabbat mein tasanno ho to samjho

wo launDi hai koi begam nahin hai

jise samjhi hai sada-lauh duniya

hai behad kaiyan budam nahin hai

nazar aate hain jo qatre gulon par

kisi ki ral hai shabnam nahin hai

zamin o aasman larzan hain jis se

mere nale hain atom-bomb nahin hai

nazar aata nahin wo ru-e-rangin

kahin bazar mein shaljam nahin hai

kahan aurat nahin hai sar-barahna

kahan ab parde ka matam nahin hai

fareb-e-hazrat-e-waiz na puchho

ibarat saf hai mubham nahin hai

chura len jis ko duzdida nigahen

ye dil wo dilruba KHanam nahin hai