na dije dawat-e-ishrat gulon ke sae mein

na diije dāvat-e-ishrat guloñ ke saa.e meñ

ki dil ko hotī hai vahshat guloñ ke saa.e meñ

ise to ḳhāna-e-vīrāñ meñ chain miltā hai

sukūñ na pā.egī hasrat guloñ ke saa.e meñ

ḳhabar na thī ki yuuñ aa.egī ab ke fasl-e-gul

ki hogī ġham kī zarūrat guloñ ke saa.e meñ

ulajh ke rah gayā dāmān-e-shauq kāñToñ meñ

na niklī jab koī hasrat guloñ ke saa.e meñ

har ek choT ubhar aa.ī hai tamanna kī

milī hai dard meñ lazzat guloñ ke saa.e meñ

na toḌā phuul koī is liye ki ai 'sāhir'

palī hai merī mohabbat guloñ ke saa.e meñ

na dije dawat-e-ishrat gulon ke sae mein

ki dil ko hoti hai wahshat gulon ke sae mein

ise to KHana-e-viran mein chain milta hai

sukun na paegi hasrat gulon ke sae mein

KHabar na thi ki yun aaegi ab ke fasl-e-gul

ki hogi gham ki zarurat gulon ke sae mein

ulajh ke rah gaya daman-e-shauq kanTon mein

na nikli jab koi hasrat gulon ke sae mein

har ek choT ubhar aai hai tamanna ki

mili hai dard mein lazzat gulon ke sae mein

na toDa phul koi is liye ki ai 'sahir'

pali hai meri mohabbat gulon ke sae mein