na diwaren hain aur na dar purana

na dīvāreñ haiñ aur na dar purānā

abhī tak phir bhī hai ye ghar purānā

Darā detā jagā detā hai mujh ko

darūn-e-zehn baiThā Dar purānā

marāhil āḳhirī ta.alīm ke haiñ

mirī maañ ne nikālā zar purānā

tamāshā phir vahī imsāl hogā

vahī dastār hogī sar purānā

sajā mātam kanār-e-dasht-e-mizhgāñ

sunā qissa vo chashm-e-tar purānā

agar hai dastaras dast-e-saḳhāvat

milā de yaar lamha bhar purānā

agar aa hī gayā hai vo to 'tāhir'

shikāyat kar na shikva kar purānā

na diwaren hain aur na dar purana

abhi tak phir bhi hai ye ghar purana

Dara deta jaga deta hai mujh ko

darun-e-zehn baiTha Dar purana

marahil aaKHiri talim ke hain

meri man ne nikala zar purana

tamasha phir wahi imsal hoga

wahi dastar hogi sar purana

saja matam kanar-e-dasht-e-mizhgan

suna qissa wo chashm-e-tar purana

agar hai dastaras dast-e-saKHawat

mila de yar lamha bhar purana

agar aa hi gaya hai wo to 'tahir'

shikayat kar na shikwa kar purana