na dikhaiyo hijr ka dard-o-alam tujhe deta hun charKH-e-KHuda ki qasam

na dikhā.iyo hijr kā dard-o-alam tujhe detā huuñ charḳh-e-ḳhudā kī qasam

mire yaar ko mujh se na kiijo judā tujhe sarvar-e-har-dūsrā kī qasam

vo sanam ka.ī din se hai mujh se ḳhafā nahīñ aatā idhar ko ḳhudā kī qasam

dil-e-mushfiq-e-man use khīñch to lā tujhe jazba-e-kāh-rubā kī qasam

yahī chāhe hai jī ki gale se lago zarā mere dahan se dahan to malo

nahīñ ġhurfe se aan ke jhāñk to lo tumheñ apnī hai sharm-o-hayā kī qasam

kabhī shab ko akelā jo pā.ūñ tujhe to gale se phir apne lagā.ūñ tujhe

kabhī chhātī pe apnī sulā.ūñ tujhe mujhe ishq ke jaur-o-jafā kī qasam

tire uThte hī pahlū meñ dard uThā tire jaate hī dam ye adam ko chalā

mujhe chhoḌ ke aah tū ghar ko na jā tujhe apne hī funduq-e-pā kī qasam

mujhe bahr-e-ḳhudā kahīñ us se chhuḌā tire hijr kī shab hai ye kaalī balā

nahīñ jhuuT maiñ kahtā kuchh is meñ zarā mujhe terī hī zulf-e-dotā kī qasam

ajī dekho to kaisī uThī hai ghaTā yahī aish kā din hai uḌā le mazā

karo bāda-kashī mire māh-laqā tumheñ detā huuñ abr-o-havā kī qasam

ajī jaatī hai aaj tū vasl kī shab nahīñ kyuuñ hai milāyā laboñ se ye lab

mujhe ab to uḌāne de aish tū ab tujhe apne hai mehr-o-vafā kī qasam

lage terī balā mujhe āfat-e-jāñ kabhū phir bhī ye kah ke khilā.egā paañ

mire sar kī qasam mirī jaañ kī qasam mire ġhamza-o-nāz-o-adā kī qasam

mareñ ġhair pe aap maiñ tum pe marūñ mujhe kyā hai ġharaz kaho kyuuñ maiñ jalūñ

yahī jī maiñ hai tum se na baat karūñ mujhe apnī is āh-e-rasā kī qasam

kise dekhūñ kaho lagūñ kis ke gale shab-e-vasl meñ mujh se jo tū ye kahe

ki ye bāda-e-surḳh tū pī le tujhe mire hāthoñ ke rañg-e-hinā kī qasam

kahāñ jaatā hai muñh ko chhupā.e hue tire hijr meñ jaate haiñ ham to mare

kabhī muḌ ke idhar ko bhī dekh to le tujhe hazrat-e-sher-e-ḳhudā kī qasam

suno serī na ho mujhe khaao ajī mujhe piiTo jo mujh ko girāo ajī

mire ghar se na aaj to jaao ajī tumheñ merī hī shab kī bukā kī qasam

mire bichhḌe ko mujh se milāo koī mire rūThe ko lā ke manāo koī

are yaaro tum us ko bulāo koī tumheñ ḳhāliq-e-arz-o-samā kī qasam

na dikhaiyo hijr ka dard-o-alam tujhe deta hun charKH-e-KHuda ki qasam

mere yar ko mujh se na kijo juda tujhe sarwar-e-har-dusra ki qasam

wo sanam kai din se hai mujh se KHafa nahin aata idhar ko KHuda ki qasam

dil-e-mushfiq-e-man use khinch to la tujhe jazba-e-kah-ruba ki qasam

yahi chahe hai ji ki gale se lago zara mere dahan se dahan to malo

nahin ghurfe se aan ke jhank to lo tumhein apni hai sharm-o-haya ki qasam

kabhi shab ko akela jo paun tujhe to gale se phir apne lagaun tujhe

kabhi chhati pe apni sulaun tujhe mujhe ishq ke jaur-o-jafa ki qasam

tere uThte hi pahlu mein dard uTha tere jate hi dam ye adam ko chala

mujhe chhoD ke aah tu ghar ko na ja tujhe apne hi funduq-e-pa ki qasam

mujhe bahr-e-KHuda kahin us se chhuDa tere hijr ki shab hai ye kali bala

nahin jhuT main kahta kuchh is mein zara mujhe teri hi zulf-e-dota ki qasam

aji dekho to kaisi uThi hai ghaTa yahi aish ka din hai uDa le maza

karo baada-kashi mere mah-laqa tumhein deta hun abr-o-hawa ki qasam

aji jati hai aaj tu wasl ki shab nahin kyun hai milaya labon se ye lab

mujhe ab to uDane de aish tu ab tujhe apne hai mehr-o-wafa ki qasam

lage teri bala mujhe aafat-e-jaan kabhu phir bhi ye kah ke khilaega pan

mere sar ki qasam meri jaan ki qasam mere ghamza-o-naz-o-ada ki qasam

maren ghair pe aap main tum pe marun mujhe kya hai gharaz kaho kyun main jalun

yahi ji main hai tum se na baat karun mujhe apni is aah-e-rasa ki qasam

kise dekhun kaho lagun kis ke gale shab-e-wasl mein mujh se jo tu ye kahe

ki ye baada-e-surKH tu pi le tujhe mere hathon ke rang-e-hina ki qasam

kahan jata hai munh ko chhupae hue tere hijr mein jate hain hum to mare

kabhi muD ke idhar ko bhi dekh to le tujhe hazrat-e-sher-e-KHuda ki qasam

suno seri na ho mujhe khao aji mujhe piTo jo mujh ko girao aji

mere ghar se na aaj to jao aji tumhein meri hi shab ki buka ki qasam

mere bichhDe ko mujh se milao koi mere ruThe ko la ke manao koi

are yaro tum us ko bulao koi tumhein KHaliq-e-arz-o-sama ki qasam