na dil-dahi na kisi aarzu ka pyasa hai

na dil-dahī na kisī aarzū kā pyāsā hai

sitam-nasīb duā-e-adū kā pyāsā hai

amīr-e-shahr ġharīb-ud-dayār ho bhī ga.e

magar libās-e-ġharībāñ rafū kā pyāsā hai

tilism Tuut na jaa.e ye zulmat-e-shab kā

charāġh-e-fikr-o-nazar justujū kā pyāsā hai

ḳhudā ke vāste mohr-e-sukūt toḌ bhī de

tamām shahr tirī guftugū kā pyāsā hai

agar ho turra-e-izzat yahāñ to kis ko mile

jise bhī dekhiye vo aabrū kā pyāsā hai

nafas nafas meñ vo mere basā huā hai magar

nafas nafas mirā us ḳhūb-rū kā pyāsā hai

savāb pyaas bujhānā hai jāntā huuñ maiñ

magar vo shaḳhs jo apne lahū kā pyāsā hai

'hayāt' fasl-e-bahārāñ hai muft meñ badnām

mizāj-e-ahl-e-junūñ hāo-hū kā pyāsā hai

na dil-dahi na kisi aarzu ka pyasa hai

sitam-nasib dua-e-adu ka pyasa hai

amir-e-shahr gharib-ud-dayar ho bhi gae

magar libas-e-ghariban rafu ka pyasa hai

tilism Tut na jae ye zulmat-e-shab ka

charagh-e-fikr-o-nazar justuju ka pyasa hai

KHuda ke waste mohr-e-sukut toD bhi de

tamam shahr teri guftugu ka pyasa hai

agar ho turra-e-izzat yahan to kis ko mile

jise bhi dekhiye wo aabru ka pyasa hai

nafas nafas mein wo mere basa hua hai magar

nafas nafas mera us KHub-ru ka pyasa hai

sawab pyas bujhana hai jaanta hun main

magar wo shaKHs jo apne lahu ka pyasa hai

'hayat' fasl-e-bahaaran hai muft mein badnam

mizaj-e-ahl-e-junun hao-hu ka pyasa hai