نہ دل دہی نہ کسی آرزو کا پیاسا ہے

نہ دل دہی نہ کسی آرزو کا پیاسا ہے

ستم نصیب دعائے عدو کا پیاسا ہے

امیر شہر غریب الدیار ہو بھی گئے

مگر لباس غریباں رفو کا پیاسا ہے

طلسم ٹوٹ نہ جائے یہ ظلمت شب کا

چراغ فکر و نظر جستجو کا پیاسا ہے

خدا کے واسطے مہر سکوت توڑ بھی دے

تمام شہر تری گفتگو کا پیاسا ہے

اگر ہو طرۂ عزت یہاں تو کس کو ملے

جسے بھی دیکھیے وہ آبرو کا پیاسا ہے

نفس نفس میں وہ میرے بسا ہوا ہے مگر

نفس نفس مرا اس خوبرو کا پیاسا ہے

ثواب پیاس بجھانا ہے جانتا ہوں میں

مگر وہ شخص جو اپنے لہو کا پیاسا ہے

حیاتؔ فصل بہاراں ہے مفت میں بدنام

مزاج اہل جنوں ہاؤ ہو کا پیاسا ہے