نہ دل کی بے بسی دیکھی نہ آنکھوں کی زباں سمجھے

نہ دل کی بے بسی دیکھی نہ آنکھوں کی زباں سمجھے

مرے شکوے کو تم بھی صرف انداز بیاں سمجھے

محبت اور کوئی بات سننے ہی نہیں دیتی

کسی کی گفتگو نکلی ہم ان کی داستاں سمجھے

ہمارے دل سے اٹھتا ہے دھواں بجلی کہیں ٹوٹے

چمن کے گوشے گوشے کو ہم اپنا آشیاں سمجھے

محبت میں نہ دامن کا بھروسہ ہے نہ اشکوں کا

اسی نے راز دل کھولا جسے ہم رازداں سمجھے

انہیں برسوں میں جب دیکھا تو رونا آ گیا دل کو

بہت چاہا کہ تھم جائیں مگر آنسو کہاں سمجھے

غزل کہنے میں اے مسرورؔ راتیں بیت جاتی ہیں

سمجھتی ہے جو دنیا شاعری کو رائیگاں سمجھے