na dil mein ana hai na koi hasad hai

na dil meñ anā hai na koī hasad hai

na fitrat meñ buġhz-o-adāvat na kad hai

hamesha sabhī kā bhalā hī kiyā hai

bhale nek hai yā bhale koī bad hai

kisī kī jo mushkil ko āsān kar de

ḳhudā us kī mushkil meñ kartā madad hai

maiñ dil chiir kar duuñ dalīl-e-mohabbat

ki us ne mohabbat kī māñgī sanad hai

tire 'ishq ne vo junūñ hai jagāyā

huī chaak merī qabā-e-ḳhirad hai

kisī se karegā bhalā vo vafā kyā

vafā ke jo mā'nī se hī nā-balad hai

ḳhudāyā ġhazab yā koī maslahat hai

tū kartā mirī har du'ā mustarad hai

dil-e-nā-tavāñ kab talak hijr kaaTe

mirī jaañ sitam kī tire koī had hai

kisī roz basnā hai zer-e-zamīñ bhī

kahīñ par mire naam kī bhī lahad hai

'sahāb' is jahāñ meñ har ik shai hai faanī

ki lāfānī bas ik ḳhudā-e-ahad hai

na dil mein ana hai na koi hasad hai

na fitrat mein bughz-o-adawat na kad hai

hamesha sabhi ka bhala hi kiya hai

bhale nek hai ya bhale koi bad hai

kisi ki jo mushkil ko aasan kar de

KHuda us ki mushkil mein karta madad hai

main dil chir kar dun dalil-e-mohabbat

ki us ne mohabbat ki mangi sanad hai

tere 'ishq ne wo junun hai jagaya

hui chaak meri qaba-e-KHirad hai

kisi se karega bhala wo wafa kya

wafa ke jo ma'ni se hi na-balad hai

KHudaya ghazab ya koi maslahat hai

tu karta meri har du'a mustarad hai

dil-e-na-tawan kab talak hijr kaTe

meri jaan sitam ki tere koi had hai

kisi roz basna hai zer-e-zamin bhi

kahin par mere nam ki bhi lahad hai

'sahab' is jahan mein har ek shai hai fani

ki lafani bas ek KHuda-e-ahad hai