na din hi chain se guzra na koi raat meri

na din hī chain se guzrā na koī raat mirī

vo sabz baaġh dikhātī rahī hayāt mirī

mire vajūd ko rahne de sañg kī sūrat

kisī nazar meñ to ā.īna hogī zaat mirī

tujhe bhī dil meñ farāġhat se maiñ samo na sakūñ

kuchh aisī tañg nahīñ hai ye kā.enāt mirī

karūñ to kaun sā unvāñ atā karūñ us ko

baTī huī hai ka.ī qistoñ meñ hayāt mirī

mirī shikast-e-anā toḌ degī ḳhud mujh ko

sajā ke log nikāleñge jab barāt mirī

sameTtā huuñ maiñ nākāmiyoñ ko jab 'shā.iq'

mirā mazāq uḌātī haiñ ḳhvāhishāt mirī

na din hi chain se guzra na koi raat meri

wo sabz bagh dikhati rahi hayat meri

mere wajud ko rahne de sang ki surat

kisi nazar mein to aaina hogi zat meri

tujhe bhi dil mein faraghat se main samo na sakun

kuchh aisi tang nahin hai ye kaenat meri

karun to kaun sa unwan ata karun us ko

baTi hui hai kai qiston mein hayat meri

meri shikast-e-ana toD degi KHud mujh ko

saja ke log nikalenge jab baraat meri

sameTta hun main nakaamiyon ko jab 'shaiq'

mera mazaq uDati hain KHwahishat meri