na din ko chain na raaton ko KHwab aankhon mein

na din ko chain na rātoñ ko ḳhvāb āñkhoñ meñ

bhar aa rahā hai tire ġham se aab āñkhoñ meñ

jidhar vo dekhe udhar saf kī saf ulaT de hai

bharī hai shoḳh ke aisī sharāb āñkhoñ meñ

thamā na ashk na niiñd aa.ī na palak jhapkī

basā hai jab se vo ḳhāna-ḳharāb āñkhoñ meñ

tumhāre ham to qadīmī ġhulām bande haiñ

tumheñ na chāhiye ham se hijāb āñkhoñ meñ

qasam hai chashm-e-gulābī kī terī ai gul-rū

ki yaañ khiñche hai paḌā nit gulāb āñkhoñ meñ

ḳhudā kī shaan jinheñ baat bhī na aatī thī

vo ab kare haiñ savāl-o-javāb āñkhoñ meñ

shitābī aan ke mahbūbo pagḌiyāñ rang lo

'nazīr' laayā hai bhar kar shahāb āñkhoñ meñ

na din ko chain na raaton ko KHwab aankhon mein

bhar aa raha hai tere gham se aab aankhon mein

jidhar wo dekhe udhar saf ki saf ulaT de hai

bhari hai shoKH ke aisi sharab aankhon mein

thama na ashk na nind aai na palak jhapki

basa hai jab se wo KHana-KHarab aankhon mein

tumhaare hum to qadimi ghulam bande hain

tumhein na chahiye hum se hijab aankhon mein

qasam hai chashm-e-gulabi ki teri ai gul-ru

ki yan khinche hai paDa nit gulab aankhon mein

KHuda ki shan jinhen baat bhi na aati thi

wo ab kare hain sawal-o-jawab aankhon mein

shitabi aan ke mahbubo pagDiyan rang lo

'nazir' laya hai bhar kar shahab aankhon mein