na darweshon ka KHirqa chahiye na taj-e-shahana

na darveshoñ kā ḳhirqa chāhiye nā tāj-e-shāhānā

mujhe to hosh de itnā rahūñ maiñ tujh pe dīvānā

kitāboñ meñ dharā hai kyā bahut likh likh ke dho Dālīñ

hamāre dil pe naqsh-e-kal-hajar hai terā farmānā

ġhanīmat jaan jo dam guzre kaifiyyat se gulshan meñ

diye jā sāqī-e-paimāñ-shikan bhar bhar ke paimānā

na dekhā vo kahīñ jalva jo dekhā ḳhāna-e-dil meñ

bahut masjid meñ sar maarā bahut sā DhūñDā but-ḳhānā

kuchh aisā ho ki jis se manzil-e-maqsūd ko pahuñchūñ

tarīq-e-pārsā.ī hove yā ho rāh-e-rindānā

ye saarī āmad-o-shud hai nafas kī āmad-o-shud par

isī tak aanā jaanā hai na phir jaanā na phir aanā

'zafar' vo zāhid-e-bedard kī hū-haq se behtar hai

kare gar rind dard-e-dil se hāv-hū-e-mastānā

na darweshon ka KHirqa chahiye na taj-e-shahana

mujhe to hosh de itna rahun main tujh pe diwana

kitabon mein dhara hai kya bahut likh likh ke dho Dalin

hamare dil pe naqsh-e-kal-hajar hai tera farmana

ghanimat jaan jo dam guzre kaifiyyat se gulshan mein

diye ja saqi-e-paiman-shikan bhar bhar ke paimana

na dekha wo kahin jalwa jo dekha KHana-e-dil mein

bahut masjid mein sar mara bahut sa DhunDa but-KHana

kuchh aisa ho ki jis se manzil-e-maqsud ko pahunchun

tariq-e-parsai howe ya ho rah-e-rindana

ye sari aamad-o-shud hai nafas ki aamad-o-shud par

isi tak aana jaana hai na phir jaana na phir aana

'zafar' wo zahid-e-bedard ki hu-haq se behtar hai

kare gar rind dard-e-dil se haw-hu-e-mastana