na fasle rahe qaem na qurbaten ab ke

na fāsle rahe qaa.em na qurbateñ ab ke

ajiib haal se guzrī haiñ ulfateñ ab ke

hamāre saath jo chaltā thā vo nahīñ aayā

guzar chalī haiñ bahāroñ kī muddateñ ab ke

har ik qadam pe sarāb-e-vafā meñ Duube the

har ik qadam pe milī haiñ haqīqateñ ab ke

vo yak-ba-yak jo milegā to kaise dekheñge

huī haiñ jis se mile ham ko muddateñ ab ke

bajā.e naqd-e-vafā ke kuchh aur baat karo

badal ga.ī haiñ jahāñ kī zarūrateñ ab ke

nahīñ hai sirf vo tanhā maiñ jaisā samjhā thā

har ek shahr meñ dekhīñ shabāhateñ ab ke

maiñ us se duur gayā thā to aa gayā 'ādil'

ḳhud apne-āp ye haiñ mujh ko hairateñ ab ke

na fasle rahe qaem na qurbaten ab ke

ajib haal se guzri hain ulfaten ab ke

hamare sath jo chalta tha wo nahin aaya

guzar chali hain bahaaron ki muddaten ab ke

har ek qadam pe sarab-e-wafa mein Dube the

har ek qadam pe mili hain haqiqaten ab ke

wo yak-ba-yak jo milega to kaise dekhenge

hui hain jis se mile hum ko muddaten ab ke

bajae naqd-e-wafa ke kuchh aur baat karo

badal gai hain jahan ki zaruraten ab ke

nahin hai sirf wo tanha main jaisa samjha tha

har ek shahr mein dekhin shabahaten ab ke

main us se dur gaya tha to aa gaya 'adil'

KHud apne-ap ye hain mujh ko hairaten ab ke