na faisla tumhaara hai na faisla hamara hai

na faisla tumhārā hai na faisla hamārā hai

ye vaqt ke qazzāq ne chhupā ke tiir maarā hai

faqīh-e-shahr zindagī kī aañkh kā jo nuur thā

vo maiñ ne tere āstāñ pe ḳhvāb lā ke vaarā hai

sitār-gāñ kī bazm meñ udaas chāñd dekhnā

na-jāne kaisā ḳhvāb hai na-jāne kyā ishāra hai

hameñ ye ḳhvāb titliyāñ talāshnā haiñ umr-bhar

ki haath ḳhālī nikle haiñ charāġh hai na taara hai

pas-e-ġhubār vaqt yuuñ pukārtā hai kaun ye

ki hijr-o-ġham kā silsila batāo kyuuñ gavārā hai

'sajjād' bhī malūl hai ki qāfila hai shaam kā

falak pe ek chāñd hai jo āḳhirī sahārā hai

na faisla tumhaara hai na faisla hamara hai

ye waqt ke qazzaq ne chhupa ke tir mara hai

faqih-e-shahr zindagi ki aankh ka jo nur tha

wo main ne tere aastan pe KHwab la ke wara hai

sitar-gan ki bazm mein udas chand dekhna

na-jaane kaisa KHwab hai na-jaane kya ishaara hai

hamein ye KHwab titliyan talashna hain umr-bhar

ki hath KHali nikle hain charagh hai na tara hai

pas-e-ghubar waqt yun pukarta hai kaun ye

ki hijr-o-gham ka silsila batao kyun gawara hai

'sajjad' bhi malul hai ki qafila hai sham ka

falak pe ek chand hai jo aaKHiri sahaara hai