نہ غم ہے شادمانی میں نہ غم میں شادمانی ہے

نہ غم ہے شادمانی میں نہ غم میں شادمانی ہے

یہ میرا مختصر قصہ ہے یہ میری کہانی ہے

تمہاری یاد کو کیسے میں اپنے سے جدا کر دوں

یہ میرے خانماں برباد دل کی اک نشانی ہے

مجھے تاکید ہے نقش قدم پر سجدے کرنے کی

مری بگڑی ہوئی قسمت انہیں شاید بنانی ہے

بس اک تصویر ناطق ہوں طلسم اعتباری میں

نہ میں ہوں زندگانی کا نہ میری زندگانی ہے

وفاداری کا مطلب بھی سمجھ لو گے ذرا ٹھہرو

ابھی نام خدا کمسن ہو آغاز جوانی ہے

عدو کا نام سنتے ہی یہ تم کیوں سہمے جاتے ہو

مجھے کوئی شکایت ہے نہ کوئی بد گمانی ہے

نہ کر عرض تمنا آرزوؔ کیا تو نہیں واقف

کبھی اس جور پرور نے کسی کی بات مانی ہے