na ghaT hai koi apna na ghar hamara hua

na ghaaT hai koī apnā na ghar hamārā huā

qayām ab ke sar-e-rah-guzar hamārā huā

ġharaz rahī na kabhī manziloñ se koī hameñ

hamesha apne hī andar safar hamārā huā

usī kī raushnī kaam aa.ī umr-bhar apne

jo ik sitāra faqat shām-bhar hamārā huā

hamāre hisse meñ dīvār hī rahī din raat

koī darīcha hamārā na dar hamārā huā

hamāre ḳhuuñ se guzar kar hī teġh-e-barq bujhī

hamāre ḳhas meñ utar kar sharar hamārā huā

zar-e-suḳhan jo luTāyā hai rāste meñ kahīñ

to duur dasht-e-havā meñ ḳhatar hamārā huā

rahe haiñ be-samar o saaya hī sar-e-hastī

barā.e naam yahāñ par shajar hamārā huā

isī meñ uljhe hue haiñ hamāre paañv abhī

jo ek ḳhvāb kabhī sar-ba-sar hamārā huā

kisī sanad kī zarūrat nahīñ paḌī hai 'zafar'

hamārā aib hī āḳhir hunar hamārā huā

na ghaT hai koi apna na ghar hamara hua

qayam ab ke sar-e-rah-guzar hamara hua

gharaz rahi na kabhi manzilon se koi hamein

hamesha apne hi andar safar hamara hua

usi ki raushni kaam aai umr-bhar apne

jo ek sitara faqat sham-bhar hamara hua

hamare hisse mein diwar hi rahi din raat

koi daricha hamara na dar hamara hua

hamare KHun se guzar kar hi tegh-e-barq bujhi

hamare KHas mein utar kar sharar hamara hua

zar-e-suKHan jo luTaya hai raste mein kahin

to dur dasht-e-hawa mein KHatar hamara hua

rahe hain be-samar o saya hi sar-e-hasti

barae nam yahan par shajar hamara hua

isi mein uljhe hue hain hamare panw abhi

jo ek KHwab kabhi sar-ba-sar hamara hua

kisi sanad ki zarurat nahin paDi hai 'zafar'

hamara aib hi aaKHir hunar hamara hua