نہ گل خنداں نہ بلبل نغمہ خواں ہے

نہ گل خنداں نہ بلبل نغمہ خواں ہے

ارے گلچیں یہ نظم گلستاں ہے

چمن میں پھر بناتا ہوں نشیمن

سنا ہے مضمحل برق تپاں ہے

جسے کہتے تھے ہم سونے کی چڑیا

یہ بھارت کیا وہی ہندوستاں ہے

صدا آتی ہے پیہم ٹھوکروں سے

یہ سنگ رہ گزر منزل رساں ہے

غلط سمت سفر کا ہے یہ حاصل

نہ جادہ ہے نہ منزل کا نشاں ہے

مجھے تار شب فرقت کا غم کیا

بہم اک شمع یاد رفتگاں ہے

سنائیں کس کو حال دل ہم اپنا

نہ محرم ہے نہ کوئی رازداں ہے

تری یادوں کا موسم ہے نظر میں

کہیں صحرا میں اک دریا رواں ہے