na hasil hua sabr-o-aram dil ka

na hāsil huā sabr-o-ārām dil kā

na niklā kabhī tum se kuchh kaam dil kā

mohabbat kā nashsha rahe kyuuñ na har-dam

bharā hai mai-e-ishq se jaam dil kā

phañsāyā to āñkhoñ ne dām-e-balā meñ

magar ishq meñ ho gayā naam dil kā

huā ḳhvāb rusvā ye ishq-e-butāñ meñ

ḳhudā hī hai ab mere badnām dil kā

ye bāñkī adā.eñ ye tirchhī nigāheñ

yahī le ga.iiñ sabr-o-ārām dil kā

dhuāñ pahle uThtā thā āġhāz thā vo

huā ḳhaak ab ye hai anjām dil kā

jab āġhāz-e-ulfat hī meñ jal rahā hai

to kyā ḳhaak batlā.ūñ anjām dil kā

ḳhudā ke liye pher do mujh ko sāhab

jo sarkār meñ kuchh na ho kaam dil kā

pas-e-marg un par khulā hāl-e-ulfat

ga.ī le ke ruuh apnī paiġhām dil kā

taḌaptā huā yuuñ na paayā hamesha

kahūñ kyā maiñ āġhāz-o-anjām dil kā

dil us be-vafā ko jo dete ho 'akbar'

to kuchh soch lo pahle anjām dil kā

na hasil hua sabr-o-aram dil ka

na nikla kabhi tum se kuchh kaam dil ka

mohabbat ka nashsha rahe kyun na har-dam

bhara hai mai-e-ishq se jam dil ka

phansaya to aankhon ne dam-e-bala mein

magar ishq mein ho gaya nam dil ka

hua KHwab ruswa ye ishq-e-butan mein

KHuda hi hai ab mere badnam dil ka

ye banki adaen ye tirchhi nigahen

yahi le gain sabr-o-aram dil ka

dhuan pahle uThta tha aaghaz tha wo

hua KHak ab ye hai anjam dil ka

jab aaghaz-e-ulfat hi mein jal raha hai

to kya KHak batlaun anjam dil ka

KHuda ke liye pher do mujh ko sahab

jo sarkar mein kuchh na ho kaam dil ka

pas-e-marg un par khula haal-e-ulfat

gai le ke ruh apni paigham dil ka

taDapta hua yun na paya hamesha

kahun kya main aaghaz-o-anjam dil ka

dil us be-wafa ko jo dete ho 'akbar'

to kuchh soch lo pahle anjam dil ka