na hai umangon ka rang koi na aks jazbon ki tazgi ka

na hai umañgoñ kā rang koī na aks jazboñ kī tāzgī kā

thakā thakā sā bujhā bujhā sā ye kaisā chehrā hai zindagī kā

sab ārzūoñ ke taar TuuTe bichhaḌ ga.e sāz-e-dil se naġhme

bharā hai chīḳhoñ se merā siina taqāza kiije na rāgnī kā

dasoñ dishāoñ se ghūrtī haiñ ġhamoñ ke mausam kī zard āñkheñ

ye kaise mumkin hai ho sake ab vajūd sarsabz aadmī kā

anā tadabbur vaqār mujh meñ talavvun aur intishār mujh meñ

mujhe na hairat se dekh duniyā mizāj huuñ bīsvīñ sadī kā

tamām lashkar aziyyatoñ ke 'shujā' ab muntazir khaḌe haiñ

jise ho bardāsht karb-o-ġham kī kare vo iz.hār āgahī kā

na hai umangon ka rang koi na aks jazbon ki tazgi ka

thaka thaka sa bujha bujha sa ye kaisa chehra hai zindagi ka

sab aarzuon ke tar TuTe bichhaD gae saz-e-dil se naghme

bhara hai chiKHon se mera sina taqaza kije na ragni ka

dason dishaon se ghurti hain ghamon ke mausam ki zard aankhen

ye kaise mumkin hai ho sake ab wajud sarsabz aadmi ka

ana tadabbur waqar mujh mein talawwun aur intishaar mujh mein

mujhe na hairat se dekh duniya mizaj hun biswin sadi ka

tamam lashkar aziyyaton ke 'shuja' ab muntazir khaDe hain

jise ho bardasht karb-o-gham ki kare wo izhaar aagahi ka