نہ ہم بدلے نہ گل بدلے نہ رنگ گلستاں بدلا

نہ ہم بدلے نہ گل بدلے نہ رنگ گلستاں بدلا

خدا ہی جانے پھر کیسے مزاج باغباں بدلا

نہ غم بدلے نہ ہم بدلے نہ جور آسماں بدلا

تو پھر کیسے یقیں آئے نظام گلستاں بدلا

بہاروں کے پس پردہ یہ کیسا انقلاب آیا

نگاہ باغباں بدلی تو سارا گلستاں بدلا

وہیں صیاد و برق و باغباں نے یورشیں کر دیں

جہاں بھی ہم نے گلشن میں مقام آشیاں بدلا

یہ معراج کمال بے خودی شوق ہی کہئے

جدھر سجدہ کیا میں نے ادھر ہی آستاں بدلا

بھنور سے تو نکل آئی مگر ساحل پہ آ ڈوبی

مری کشتی نے بدلا بھی تو رخ آ کر کہاں بدلا

رہی اصلاح کی ناکام ہر کاوش مقدر سے

بدلنا تھا نہ انداز مزاج باغباں بدلا

چمن والوں کی دنیا تو بدل کر رہ گئی لیکن

نہ آہ شب میں فرق آیا نہ انداز فغاں بدلا

وہاں بے سود ہے انصاف کی امید ہی رکھنا

وفاؤں کا ملے اے دل جفاؤں سے جہاں بدلا

رضیؔ ہر اک نفس پر زندگی بھر انقلاب آئے

مگر جو اپنی قسمت میں لکھا تھا وہ کہاں بدلا