na hum badle na gul badle na rang-e-gulsitan badla

na ham badle na gul badle na rang-e-gulsitāñ badlā

ḳhudā hī jaane phir kaise mizāj-e-bāġhbāñ badlā

na ġham badle na ham badle na jor-e-āsmāñ badlā

to phir kaise yaqīñ aa.e nizām-e-gulsitāñ badlā

bahāroñ ke pas-e-parda ye kaisā inqilāb aaya

nigāh-e-bāġhbāñ badlī to saarā gulsitāñ badlā

vahīñ sayyād o barq o bāġhbāñ ne yūrisheñ kar diiñ

jahāñ bhī ham ne gulshan meñ maqām-e-āshiyāñ badlā

ye me.arāj-e-kamāl-e-be-ḳhudī-e-shauq hī kahiye

jidhar sajda kiyā maiñ nai udhar hī āstāñ badlā

bhañvar se to nikal aa.ī magar sāhil pe aa Duubī

mirī kashtī ne badlā bhī to ruḳh aa kar kahāñ badlā

rahī islāh kī nākām har kāvish muqaddar se

badalnā thā na andāz-e-mizāj-e-bāġhbāñ badlā

chaman vāloñ kī duniyā to badal kar rah ga.ī lekin

na āh-e-shab meñ farq aaya na andāz-e-fuġhāñ badlā

vahāñ be-sūd hai insāf kī ummīd hī rakhnā

vafāoñ kā mile ai dil jafāoñ se jahāñ badlā

'razī' har ik nafas par zindagī bhar inqalāb aa.e

magar jo apnī qismat meñ likhā thā vo kahāñ badlā

na hum badle na gul badle na rang-e-gulsitan badla

KHuda hi jaane phir kaise mizaj-e-baghban badla

na gham badle na hum badle na jor-e-asman badla

to phir kaise yaqin aae nizam-e-gulsitan badla

bahaaron ke pas-e-parda ye kaisa inqilab aaya

nigah-e-baghban badli to sara gulsitan badla

wahin sayyaad o barq o baghban ne yurishen kar din

jahan bhi hum ne gulshan mein maqam-e-ashiyan badla

ye mearaj-e-kamal-e-be-KHudi-e-shauq hi kahiye

jidhar sajda kiya main nai udhar hi aastan badla

bhanwar se to nikal aai magar sahil pe aa Dubi

meri kashti ne badla bhi to ruKH aa kar kahan badla

rahi islah ki nakaam har kawish muqaddar se

badalna tha na andaz-e-mizaj-e-baghban badla

chaman walon ki duniya to badal kar rah gai lekin

na aah-e-shab mein farq aaya na andaz-e-fughan badla

wahan be-sud hai insaf ki ummid hi rakhna

wafaon ka mile ai dil jafaon se jahan badla

'razi' har ek nafas par zindagi bhar inqalab aae

magar jo apni qismat mein likha tha wo kahan badla