na ho marzi KHuda ki to kisi se kuchh nahin hota

na ho marzī ḳhudā kī to kisī se kuchh nahīñ hotā

jo chāhe aadmī to aadmī se kuchh nahīñ hotā

kahāñ ke dost kaise aqrabā jab vaqt paḌtā hai

musībat meñ kisī kī dostī se kuchh nahīñ hotā

amal kī zindagānī dar-haqīqat zindagānī hai

jiye jaao to ḳhālī zindagī se kuchh nahīñ hotā

ajal aa.egī jaañ jā.egī ik sā.at-muayyan par

azīz-o-aqribā kī pairvī se kuchh nahīñ hotā

adab ke qadr-dāñ bazm-e-adab se uThte jaate haiñ

lo rakkho shā.irī ab shā.irī se kuchh nahīñ hotā

mirī hālat ye kuchh maḳhsūs dil bechain haiñ lekin

ye mushkil hai kisī kī bekalī se kuchh nahīñ hotā

'safīr' is zindagī meñ vaqt bhī tevar badaltā

na ghabrāo kisī kī dushmanī se kuchh nahīñ hotā

na ho marzi KHuda ki to kisi se kuchh nahin hota

jo chahe aadmi to aadmi se kuchh nahin hota

kahan ke dost kaise aqraba jab waqt paDta hai

musibat mein kisi ki dosti se kuchh nahin hota

amal ki zindagani dar-haqiqat zindagani hai

jiye jao to KHali zindagi se kuchh nahin hota

ajal aaegi jaan jaegi ek saat-muayyan par

aziz-o-aqriba ki pairwi se kuchh nahin hota

adab ke qadr-dan bazm-e-adab se uThte jate hain

lo rakkho shairi ab shairi se kuchh nahin hota

meri haalat ye kuchh maKHsus dil bechain hain lekin

ye mushkil hai kisi ki bekali se kuchh nahin hota

'safir' is zindagi mein waqt bhi tewar badalta

na ghabrao kisi ki dushmani se kuchh nahin hota