na ho tu jis mein wo dil bhi hai kya dil

na ho tū jis meñ vo dil bhī hai kyā dil

nikammā dil burā dil bad-numā dil

butoñ ko de diyā nām-e-ḳhudā dil

'saḳhā' merī bhī kyā himmat hai kyā dil

uThe āġhosh se jab dard uTThā

hile pahlū se jab vo hil gayā dil

abhī kamsin haiñ rusvā.ī kā Dar hai

nahīñ lete kisī badnām kā dil

suñghā kar nik.hat-e-zulf-e-muambar

uḌā kar le ga.ī bād-e-sabā dil

phire mujh se to goyā phir gayā baḳht

baḌhe merī taraf to baḌh gayā dil

vahī kāvish vahī sozish vahī dard

tirā paikān hai goyā mirā dil

hameñ bhī ranj-o-rāhat kī ḳhabar thī

hamāre paas bhī tiflī se thā dil

mire mahbūb ke mahbūb ho tum

fidā huuñ dil pe maiñ tum par fidā dil

sambhal hī jā.egā insāñ hai yārab

pighal hī jā.egā patthar hai yā dil

'saḳhā' jo mujh pe guzregī sahūñgā

mire siine meñ hai itnā baḌā dil

na ho tu jis mein wo dil bhi hai kya dil

nikamma dil bura dil bad-numa dil

buton ko de diya nam-e-KHuda dil

'saKHa' meri bhi kya himmat hai kya dil

uThe aaghosh se jab dard uTTha

hile pahlu se jab wo hil gaya dil

abhi kamsin hain ruswai ka Dar hai

nahin lete kisi badnam ka dil

sungha kar nikhat-e-zulf-e-muambar

uDa kar le gai baad-e-saba dil

phire mujh se to goya phir gaya baKHt

baDhe meri taraf to baDh gaya dil

wahi kawish wahi sozish wahi dard

tera paikan hai goya mera dil

hamein bhi ranj-o-rahat ki KHabar thi

hamare pas bhi tifli se tha dil

mere mahbub ke mahbub ho tum

fida hun dil pe main tum par fida dil

sambhal hi jaega insan hai yarab

pighal hi jaega patthar hai ya dil

'saKHa' jo mujh pe guzregi sahunga

mere sine mein hai itna baDa dil