na hoga soz-e-dil shayad kisi surat bhi kam mera

na hogā soz-e-dil shāyad kisī sūrat bhī kam merā

mujhe āzād kar ab zindagī ghuTtā hai dam merā

zamīñ dhañs jaa.e jhuk jaa.e falak nākām ho duniyā

uThānā chāheñ gar mil kar sabhī ye bār-e-ġham merā

agar chāho to siina chaak kar ke dil dikhātā huuñ

bayāñ lafzoñ meñ ho saktā nahīñ dard-o-alam merā

asar hotā hai ulTā had se jab baḌhne lage kuchh bhī

baḌhā itnā ki āḳhir ban gayā taskīn-e-ġham merā

qadam rakkhā hī thā us shaḳhs ne is dil kī chaukhaT par

zamīñ se lag gayā tā’zīm meñ sar ho ke ḳham merā

tumhī duniyā the merī tum jo bichhḌe luT ga.ī duniyā

ujaḌ kar rah gayā pal-bhar meñ sab jāh-o-hasham merā

nasīhat sun rahā huuñ shaiḳh kī botal pe nazreñ haiñ

nigāheñ sū-e-mai-ḳhāna haiñ ruḳh sū-e-haram merā

hazāroñ rāste tai kar ke bhī 'yāsir' musāfir huuñ

na jaane kaun sī manzil kā ḳhvāhāñ hai qadam merā

na hoga soz-e-dil shayad kisi surat bhi kam mera

mujhe aazad kar ab zindagi ghuTta hai dam mera

zamin dhans jae jhuk jae falak nakaam ho duniya

uThana chahen gar mil kar sabhi ye bar-e-gham mera

agar chaho to sina chaak kar ke dil dikhata hun

bayan lafzon mein ho sakta nahin dard-o-alam mera

asar hota hai ulTa had se jab baDhne lage kuchh bhi

baDha itna ki aaKHir ban gaya taskin-e-gham mera

qadam rakkha hi tha us shaKHs ne is dil ki chaukhaT par

zamin se lag gaya ta’zim mein sar ho ke KHam mera

tumhi duniya the meri tum jo bichhDe luT gai duniya

ujaD kar rah gaya pal-bhar mein sab jah-o-hasham mera

nasihat sun raha hun shaiKH ki botal pe nazren hain

nigahen su-e-mai-KHana hain ruKH su-e-haram mera

hazaron raste tai kar ke bhi 'yasir' musafir hun

na jaane kaun si manzil ka KHwahan hai qadam mera