na hote ahl-e-dil ahl-e-sitam jaane kahan jate

na hote ahl-e-dil ahl-e-sitam jaane kahāñ jaate

ye barq-andāz jalve aag barsāne kahāñ jaate

sabhī zāhid-sifat hote to maiḳhāne kahāñ jaate

shabāb-o-kaif-o-sarmastī ke afsāne kahāñ jaate

vo yuuñ kahiye ki Thokar khā ke aatā hai sañbhal jaanā

vagarna tum se zālim ham se pahchāne kahāñ jaate

junūñ gar inqilāb-e-dahr kī rāhoñ pe chal paḌtā

janāb-e-ḳhizr kyā karte ye farzāne kahāñ jaate

mujassam barf hoñ jazbāt jin ke un se kyā hāsil

ham aisī be-hisī meñ ḳhuun garmāne kahāñ jaate

mire hī dam se haiñ 'manzūr' un kī jalva-gāheñ bhī

vagarna hashr-sāmāñ naaz farmāne kahāñ jaate

na hote ahl-e-dil ahl-e-sitam jaane kahan jate

ye barq-andaz jalwe aag barsane kahan jate

sabhi zahid-sifat hote to maiKHane kahan jate

shabab-o-kaif-o-sarmasti ke afsane kahan jate

wo yun kahiye ki Thokar kha ke aata hai sanbhal jaana

wagarna tum se zalim hum se pahchane kahan jate

junun gar inqilab-e-dahr ki rahon pe chal paDta

janab-e-KHizr kya karte ye farzane kahan jate

mujassam barf hon jazbaat jin ke un se kya hasil

hum aisi be-hisi mein KHun garmane kahan jate

mere hi dam se hain 'manzur' un ki jalwa-gahen bhi

wagarna hashr-saman naz farmane kahan jate