na hoti bhiD rindon ki to maiKHane kidhar jate

na hotī bhiiḌ rindoñ kī to maiḳhāne kidhar jaate

ye mai-noshī kahāñ hotī ye paimāne kidhar jaate

agar insān ban jaate kabhī shaiḳh-o-barahman bhī

to ye ka.aba kahāñ hotā ye but-ḳhāne kidhar jaate

charāġh-e-ḳhāna se vo ban ga.e haiñ sham.a mahfil kī

agar aisā na hotā phir ye parvāne kidhar jaate

hamārī bāda-noshī par huā hairān kyoñ zāhid

na hote piine vaale hī to maiḳhāne kidhar jaate

chaman-zār-e-jahāñ meñ gul hī gul hote agar har sū

to ye kāñTe kahāñ rahte ye vīrāne kidhar jaate

agar siine meñ dil hotā na pahlū meñ jigar hotā

kahāñ paltī mohabbat us ke afsāne kidhar jaate

tirī bātoñ kā ai zāhid agar kuchh bhī asar hotā

namāzī saf-ba-saf hote ye mastāne kidhar jaate

agar vo apne bandoñ par dar-e-rahmat na vā kartā

to ye bande ḳhudā ke phir ḳhudā jaane kidhar jaate

siyah-baḳhtī meñ apne bhī parā.e ho ga.e 'āzam'

agar hotā na ye andher begāne kidhar jaate

na hoti bhiD rindon ki to maiKHane kidhar jate

ye mai-noshi kahan hoti ye paimane kidhar jate

agar insan ban jate kabhi shaiKH-o-barahman bhi

to ye kaba kahan hota ye but-KHane kidhar jate

charagh-e-KHana se wo ban gae hain shama mahfil ki

agar aisa na hota phir ye parwane kidhar jate

hamari baada-noshi par hua hairan kyon zahid

na hote pine wale hi to maiKHane kidhar jate

chaman-zar-e-jahan mein gul hi gul hote agar har su

to ye kanTe kahan rahte ye virane kidhar jate

agar sine mein dil hota na pahlu mein jigar hota

kahan palti mohabbat us ke afsane kidhar jate

teri baaton ka ai zahid agar kuchh bhi asar hota

namazi saf-ba-saf hote ye mastane kidhar jate

agar wo apne bandon par dar-e-rahmat na wa karta

to ye bande KHuda ke phir KHuda jaane kidhar jate

siyah-baKHti mein apne bhi parae ho gae 'azam'

agar hota na ye andher begane kidhar jate