na hui humse shab basar na hui

na huī ham se shab basar na huī

kis se pūchheñ ki kyuuñ sahar na huī

vo nazar-shoḳh-o-fitna-zā hī sahī

kyuuñ mire hāl-e-zār par na huī

bazm meñ ye adā hameñ samjhe

sab ko dekhā udhar nazar na huī

ai mirā haal pūchhne vaale

tujh ko ab tak mirī ḳhabar na huī

ham isī zindagī pe marte haiñ

jo yahāñ chain se basar na huī

kaise kaise sitam hue tujh par

kyuuñ mire dil tujhe ḳhabar na huī

ruuh aalam meñ phūñk dī to kyā

merī jānib to ik nazar na huī

uf mire ġham-kade kī tārīkī

aap aa.e bhī to sahar na huī

dil ne duniyā na.ī banā Daalī

aur hameñ aaj tak ḳhabar na huī

mujh se ruḳhsat huī thī jab duniyā

tum kahāñ the tumheñ ḳhabar na huī

hijr kī raat kāTne vaale

kyā karegā agar sahar na huī

ḳhush raheñ vo ye mudda.ā thā 'azīz'

na huī zindagī basar na huī

na hui hum se shab basar na hui

kis se puchhen ki kyun sahar na hui

wo nazar-shoKH-o-fitna-za hi sahi

kyun mere haal-e-zar par na hui

bazm mein ye ada hamein samjhe

sab ko dekha udhar nazar na hui

ai mera haal puchhne wale

tujh ko ab tak meri KHabar na hui

hum isi zindagi pe marte hain

jo yahan chain se basar na hui

kaise kaise sitam hue tujh par

kyun mere dil tujhe KHabar na hui

ruh aalam mein phunk di to kya

meri jaanib to ek nazar na hui

uf mere gham-kade ki tariki

aap aae bhi to sahar na hui

dil ne duniya nai bana Dali

aur hamein aaj tak KHabar na hui

mujh se ruKHsat hui thi jab duniya

tum kahan the tumhein KHabar na hui

hijr ki raat kaTne wale

kya karega agar sahar na hui

KHush rahen wo ye muddaa tha 'aziz'

na hui zindagi basar na hui