na ibtida-e-junun hai na intiha-e-junun

na ibtidā-e-junūñ hai na intihā-e-junūñ

bas ek fitna hai kahiye jise adā-e-junūñ

vo gul kī tarah se hañstā hai merī hālat par

irāda ab hai koī aur gul khilā.e junūñ

kamāl ye hai ḳhirad bhī talāsh kartī hai

barā-e-sajda-ta.azīm naqsh-e-pā-e-junūñ

ye apnī apnī tabī.at hai kyā kiyā jaa.e

tumheñ rulā.e junūñ aur mujhe hañsā.e junūñ

vajūd-e-āshiq-o-ma.ashūq se jahāñ raushan

vo nūr-e-vasl hai jis se kī jagmagā.e junūñ

asar ye hotā hai sūraj bhī jaag uTThā hai

ki chheḌ kartī hai ġhunchoñ se jab sabā-e-junūñ

vo mujh se martaba-e-ishq meñ buland rahe

ḳhudā kare vo chalā jaa.e māvarā-e-junūñ

jo tujh ko chhūtā hai anmol ho hī jaatā hai

tire vajūd meñ hai yaar kīmiyā-e-junūñ

'suhail' us ko bhī hai e'tirāf-e-jazba-e-shauq

vo ban gayā hai mubārak ho dil-rubā-e-junūñ

na ibtida-e-junun hai na intiha-e-junun

bas ek fitna hai kahiye jise ada-e-junun

wo gul ki tarah se hansta hai meri haalat par

irada ab hai koi aur gul khilae junun

kamal ye hai KHirad bhi talash karti hai

bara-e-sajda-tazim naqsh-e-pa-e-junun

ye apni apni tabiat hai kya kiya jae

tumhein rulae junun aur mujhe hansae junun

wajud-e-ashiq-o-mashuq se jahan raushan

wo nur-e-wasl hai jis se ki jagmagae junun

asar ye hota hai suraj bhi jag uTTha hai

ki chheD karti hai ghunchon se jab saba-e-junun

wo mujh se martaba-e-ishq mein buland rahe

KHuda kare wo chala jae mawara-e-junun

jo tujh ko chhuta hai anmol ho hi jata hai

tere wajud mein hai yar kimiya-e-junun

'suhail' us ko bhi hai e'tiraf-e-jazba-e-shauq

wo ban gaya hai mubarak ho dil-ruba-e-junun