na ibtida hun kisi ki na intiha hun main

na ibtidā huuñ kisī kī na intihā huuñ maiñ

ta.ayyunāt kī had se guzar gayā huuñ maiñ

jo nā-murād-e-azal hai vo iltijā huuñ maiñ

asar se duur jo rahtī hai vo duā huuñ maiñ

tire jamāl kā ā.īna ban gayā huuñ maiñ

hazār pardoñ meñ chhup kar chamak rahā huuñ maiñ

ilāhī kis kī nigāhoñ se gir gayā huuñ maiñ

har ek aañkh ko hasrat se tak rahā huuñ maiñ

tirā karam to ḳhudā jaane kyā sitam hogā

ki jab sitam pe tire jaan de rahā huuñ maiñ

na baaġh se mujhe matlab na baaġh vāloñ se

bahak ke dasht se gulshan meñ aa gayā huuñ maiñ

tujhe ḳhabar bhī hai o muḌ ke dekhne vaale

tirī nigāh pe kyā kyā luTā rahā huuñ maiñ

mirī nazar se Tapaktī hai aarzū dil kī

sadā-e-qalb huuñ ḳhāmosh-e-iltijā huuñ maiñ

madad kā vaqt hai ai nāḳhudā-e-kashtī-e-dil

tajalliyāt kī maujoñ meñ ghir gayā huuñ maiñ

har ek aañkh mujhe tak rahī hai hairat se

'munīr' kis kī nigāhoñ kā aa.ina huuñ maiñ

na ibtida hun kisi ki na intiha hun main

tayyunat ki had se guzar gaya hun main

jo na-murad-e-azal hai wo iltija hun main

asar se dur jo rahti hai wo dua hun main

tere jamal ka aaina ban gaya hun main

hazar pardon mein chhup kar chamak raha hun main

ilahi kis ki nigahon se gir gaya hun main

har ek aankh ko hasrat se tak raha hun main

tera karam to KHuda jaane kya sitam hoga

ki jab sitam pe tere jaan de raha hun main

na bagh se mujhe matlab na bagh walon se

bahak ke dasht se gulshan mein aa gaya hun main

tujhe KHabar bhi hai o muD ke dekhne wale

teri nigah pe kya kya luTa raha hun main

meri nazar se Tapakti hai aarzu dil ki

sada-e-qalb hun KHamosh-e-iltija hun main

madad ka waqt hai ai naKHuda-e-kashti-e-dil

tajalliyat ki maujon mein ghir gaya hun main

har ek aankh mujhe tak rahi hai hairat se

'munir' kis ki nigahon ka aaina hun main