na iltimas-o-guzarish na iltija koi

na iltimās-o-guzārish na iltijā koī

na koī harf-e-duā hai na mudda.ā koī

koī shikāyat-o-shikva bhī hai to ḳhud se hai

fareb-e-vaqt se hargiz nahīñ gila koī

maiñ is yaqīn ko kaise gumāñ shumār karūñ

abhī talak to mire saath saath thā koī

vo merī ruuh meñ ehsās-e-lams chhoḌ gayā

kuchh itne paas se ho kar guzar gayā koī

bas ek kashtī talātum kī zad meñ aane do

ye nāḳhudā bhī pukāreñge hai ḳhudā koī

ye vāqi.a bhī ajab hai ki ḳhatm-e-nūr ke ba.ad

dhuāñ pukārtā hai bujh gayā diyā koī

unheñ bhī tark-e-marāsim se ik zarar pahuñchā

ki chaah kar bhī na de paa.e ġham nayā koī

vo ek duur kī āvāz sab pe chhā.ī rahī

bahut qarīb se detā rahā sadā koī

fasīl-e-zabt pe rakkhā huā charāġh huuñ maiñ

bujhā na pā.egī hargiz mujhe havā koī

na iltimas-o-guzarish na iltija koi

na koi harf-e-dua hai na muddaa koi

koi shikayat-o-shikwa bhi hai to KHud se hai

fareb-e-waqt se hargiz nahin gila koi

main is yaqin ko kaise guman shumar karun

abhi talak to mere sath sath tha koi

wo meri ruh mein ehsas-e-lams chhoD gaya

kuchh itne pas se ho kar guzar gaya koi

bas ek kashti talatum ki zad mein aane do

ye naKHuda bhi pukarenge hai KHuda koi

ye waqia bhi ajab hai ki KHatm-e-nur ke baad

dhuan pukarta hai bujh gaya diya koi

unhen bhi tark-e-marasim se ek zarar pahuncha

ki chah kar bhi na de pae gham naya koi

wo ek dur ki aawaz sab pe chhai rahi

bahut qarib se deta raha sada koi

fasil-e-zabt pe rakkha hua charagh hun main

bujha na paegi hargiz mujhe hawa koi