na ishrat ki tamanna hai na mahfil ki tamanna hai

na ishrat kī tamanna hai na mahfil kī tamanna hai

faqat ik ḳhalvat-e-ġham-āshnā dil kī tamanna hai

tirī daryūzgī meñ lutf aatā hai use varna

tujhe ma.alūm hai jo tere saa.il kī tamanna hai

kuchh aisī āfiyat meñ tere dīvāne nazar aa.e

ki ab dīvāngī har ek aaqil kī tamanna hai

ye madd-o-jazr sab jazb-e-mohabbat ke karishme haiñ

ham-āġhoshī-e-bāham bahr-o-sāhil kī tamanna hai

mirī turbat bane yūñhī zamīn-e-kū-e-jānāñ meñ

ilāhī jis tarah dil meñ mire dil kī tamanna hai

na nikle koī armāñ bas yahī armāñ hai le de kar

mire dil kī tamanna hī mire dil kī tamanna hai

muhāl-o-mumkin-o-dushvār-o-āsāñ jam.a haiñ is meñ

na.ī duniyā nayā aalam mire dil kī tamanna hai

dil-e-pur-ārzū ne zindagī bhar ḳhaak chhanvā.ī

bas ab ai 'yās' ik be-ārzū dil kī tamanna he

na ishrat ki tamanna hai na mahfil ki tamanna hai

faqat ek KHalwat-e-gham-ashna dil ki tamanna hai

teri daryuzgi mein lutf aata hai use warna

tujhe malum hai jo tere sail ki tamanna hai

kuchh aisi aafiyat mein tere diwane nazar aae

ki ab diwangi har ek aaqil ki tamanna hai

ye madd-o-jazr sab jazb-e-mohabbat ke karishme hain

ham-aghoshi-e-baham bahr-o-sahil ki tamanna hai

meri turbat bane yunhi zamin-e-ku-e-jaanan mein

ilahi jis tarah dil mein mere dil ki tamanna hai

na nikle koi arman bas yahi arman hai le de kar

mere dil ki tamanna hi mere dil ki tamanna hai

muhaal-o-mumkin-o-dushwar-o-asan jama hain is mein

nai duniya naya aalam mere dil ki tamanna hai

dil-e-pur-arzu ne zindagi bhar KHak chhanwai

bas ab ai 'yas' ek be-arzu dil ki tamanna he