na jaane daur kaisa aa raha hai

na jaane daur kaisā aa rahā hai

jise dekho vahī samjhā rahā hai

kabhī is baat par ro.egā tū bhī

abhī jis baat par itrā rahā hai

ziyāda se ziyāda kī talab meñ

musalsal ḳharch hotā jā rahā hai

chabā.e jā rahī hai terī sāñseñ

tū jis roTī ke luqme khā rahā hai

tujhe jhulsā rahī hai terī cigarette

jise tū shauq se sulgā rahā hai

tujhe tezī nigaltī jā rahī hai

tū bhāgā sirf bhāgā jā rahā hai

har ik lamha tirā girvī paḌā hai

kalā.ī par nazar Thahrā rahā hai

tujhe ḳhvāboñ ne zaḳhmī kar diyā kyā

jo yuuñ tā۔bīr ko taḌpā rahā hai

haqīqat meñ fasāne ko milā kar

fasāne meñ haqīqat lā rahā hai

tujhe us ne ragaḌ ke rakh diyā hai

tū jis dūkān ko chamkā rahā hai

na jaane daur kaisa aa raha hai

jise dekho wahi samjha raha hai

kabhi is baat par roega tu bhi

abhi jis baat par itra raha hai

ziyaada se ziyaada ki talab mein

musalsal KHarch hota ja raha hai

chabae ja rahi hai teri sansen

tu jis roTi ke luqme kha raha hai

tujhe jhulsa rahi hai teri cigarette

jise tu shauq se sulga raha hai

tujhe tezi nigalti ja rahi hai

tu bhaga sirf bhaga ja raha hai

har ek lamha tera girwi paDa hai

kalai par nazar Thahra raha hai

tujhe KHwabon ne zaKHmi kar diya kya

jo yun ta۔bir ko taDpa raha hai

haqiqat mein fasane ko mila kar

fasane mein haqiqat la raha hai

tujhe us ne ragaD ke rakh diya hai

tu jis dukan ko chamka raha hai