na jaane kab ki dabi talKHiyan nikal aain

na jaane kab kī dabī talḳhiyāñ nikal aa.iiñ

zarā sī baat thī aur barchhiyāñ nikal aa.iiñ

huā ye ham pe añdheroñ kī sāzishoñ kā asar

hamāre zehn meñ bhī khiḌkiyāñ nikal aa.iiñ

mujhe navāz dī maulā ne phuul sī beTī

mire hisāb meñ kuchh nekiyāñ nikal aa.iiñ

vo peḌ jis pe qazā ban ke bijliyāñ TūTīñ

sunā hai us pe harī pattiyāñ nikal aa.iiñ

badaltī rut meñ ye kam-zarfiyoñ kā aalam hai

biloñ se pañkh liye chyūñTiyāñ nikal aa.iiñ

ḳhudā ke vāste ab to safar tamām karo

ki ab qafas se bhī to uñgliyāñ nikal aa.iiñ

ye mo.ajiza hī to hai ai 'nafas' ki tūfāñ meñ

samundaroñ se sabhī kashtiyāñ nikal aa.iiñ

na jaane kab ki dabi talKHiyan nikal aain

zara si baat thi aur barchhiyan nikal aain

hua ye hum pe andheron ki sazishon ka asar

hamare zehn mein bhi khiDkiyan nikal aain

mujhe nawaz di maula ne phul si beTi

mere hisab mein kuchh nekiyan nikal aain

wo peD jis pe qaza ban ke bijliyan TuTin

suna hai us pe hari pattiyan nikal aain

badalti rut mein ye kam-zarfiyon ka aalam hai

bilon se pankh liye chyunTiyan nikal aain

KHuda ke waste ab to safar tamam karo

ki ab qafas se bhi to ungliyan nikal aain

ye moajiza hi to hai ai 'nafas' ki tufan mein

samundaron se sabhi kashtiyan nikal aain