na jaane kaun hai kya hai kahan se aaya hai

na jaane kaun hai kyā hai kahāñ se aayā hai

vo merā ain hai yā ḳhvāb hai yā dhokā hai

na dekh vaqt yuuñ mujh ko ye terā chehra hai

jo shaḳhs mujh meñ chhupā hai vo kitnā saada hai

havā ke ghuñghrū haiñ sākit thakī thakī hai shaam

udāsiyoñ kā har ik samt jaal phailā hai

fazā meñ uḌte parindoñ ne par sameT liye

nuzūl-e-shām hai aur rāsta akelā hai

tamām khel huā din Dhalā chalo ab ghar

na jaane mujh meñ utartā ye dard kaisā hai

siyāh raat kā panchhī hai pañkh phailā.e

magar diloñ meñ bahut duur tak ujālā hai

use bhī saath na mauj-e-balā to le jaanā

yahīñ pe mere sakūñ kā jazīra Duubā hai

guzishta zaḳhmoñ ke Tāñke masakte jaate haiñ

kisī ne duur bahut duur se pukārā hai

'shamīm' biitī rutoñ kī hai chāñdnī phailī

fasīl-e-shab se ḳhayāloñ kā chāñd ubhrā hai

na jaane kaun hai kya hai kahan se aaya hai

wo mera ain hai ya KHwab hai ya dhoka hai

na dekh waqt yun mujh ko ye tera chehra hai

jo shaKHs mujh mein chhupa hai wo kitna sada hai

hawa ke ghunghru hain sakit thaki thaki hai sham

udasiyon ka har ek samt jal phaila hai

faza mein uDte parindon ne par sameT liye

nuzul-e-sham hai aur rasta akela hai

tamam khel hua din Dhala chalo ab ghar

na jaane mujh mein utarta ye dard kaisa hai

siyah raat ka panchhi hai pankh phailae

magar dilon mein bahut dur tak ujala hai

use bhi sath na mauj-e-bala to le jaana

yahin pe mere sakun ka jazira Duba hai

guzishta zaKHmon ke Tanke masakte jate hain

kisi ne dur bahut dur se pukara hai

'shamim' biti ruton ki hai chandni phaili

fasil-e-shab se KHayalon ka chand ubhra hai