na jaane kaun sa manzar sadaen deta hai

na jaane kaun sā manzar sadā.eñ detā hai

maiñ piilī dhuup vo niilī havā.eñ detā hai

kisī ke chehre pe gard-e-malāl dekhtī huuñ

ḳhudā kabhī na kabhī to sazā.eñ detā hai

ḳhayāl-e-yār ne āñkheñ hamārī nam rakkhīñ

jamāl-e-yār palaT ke jafā.eñ detā hai

tire mazār se vīre! mahak sī aatī hai

tū mujh se duur bhī rah kar duā.eñ detā hai

ġhubār-e-ġham hai shab-e-hijr aur maiñ kamlī

firāq-e-yār bhī kyā kyā adā.eñ detā hai

safar kī dhuul thakan aable shikasta badan

ye sher yuuñ nahīñ hotā balā.eñ detā hai

tū jis maqām pe baiThī hai rābiya 'basrī'

faqat ye naam hī tujh ko ziyā.eñ detā hai

na jaane kaun sa manzar sadaen deta hai

main pili dhup wo nili hawaen deta hai

kisi ke chehre pe gard-e-malal dekhti hun

KHuda kabhi na kabhi to sazaen deta hai

KHayal-e-yar ne aankhen hamari nam rakkhin

jamal-e-yar palaT ke jafaen deta hai

tere mazar se wire! mahak si aati hai

tu mujh se dur bhi rah kar duaen deta hai

ghubar-e-gham hai shab-e-hijr aur main kamli

firaq-e-yar bhi kya kya adaen deta hai

safar ki dhul thakan aable shikasta badan

ye sher yun nahin hota balaen deta hai

tu jis maqam pe baiThi hai rabiya 'basri'

faqat ye nam hi tujh ko ziyaen deta hai