نہ جانے کون سی الجھن رواں سینے میں رہتی ہے

نہ جانے کون سی الجھن رواں سینے میں رہتی ہے

بہ ہر لمحہ مرے تار نفس میں گانٹھ پڑتی ہے

ترے ہونے سے تھے رنگ طرب کیا کیا نظاروں میں

مگر اب شہر دل میں خاک اور بس خاک اڑتی ہے

لگا لیتی ہے سینے سے کسی کی نقرئی یادیں

شب تاریک میری یوں ستارہ یاب ہوتی ہے

کہیں گرد مہ و انجم جنون دل اڑاتا ہے

کہیں محمل میں لیلائے طلب افسردہ بیٹھی ہے

کرم اے گنج خوبی اک نظر کی بھیک تو دے دے

کہ اک مدت سے خالی یہ مرا دست سوالی ہے