na-jaane kis ki dua hai ki kaam chal raha hai

na-jāne kis kī du'ā hai ki kaam chal rahā hai

koī nizām nahīñ aur nizām chal rahā hai

rah-e-vafā meñ bichhe haiñ jafā ke angāre

jo chal rahā hai vo do-chār gaam chal rahā hai

ka.ī adīboñ ke nāmard ho chuke haiñ qalam

ka.ī baras se faqat un kā naam chal rahā hai

ḳhabar milī hai ki āqā-parast bastī meñ

kisī ke pīchhe kisī kā ġhulām chal rahā hai

jo khā chukā hai hamāre shakeb aur sarvat

suḳhan-kadoñ meñ vahī harf-e-ḳhām chal rahā hai

maiñ jāntā huuñ jo nā-shā’iroñ kī hai qīmat

maiñ jāntā huuñ jo in sab kā daam chal rahā hai

hai sabt muhr-e-sifārish hasīn jismoñ par

adab kī manDī meñ māl-e-harām chal rahā hai

tujhe ḳhabar nahīñ 'vāsif' badan ke sikke kī

ai mere dost ye sikka to 'aam chal rahā hai

na-jaane kis ki du'a hai ki kaam chal raha hai

koi nizam nahin aur nizam chal raha hai

rah-e-wafa mein bichhe hain jafa ke angare

jo chal raha hai wo do-chaar gam chal raha hai

kai adibon ke namard ho chuke hain qalam

kai baras se faqat un ka nam chal raha hai

KHabar mili hai ki aaqa-parast basti mein

kisi ke pichhe kisi ka ghulam chal raha hai

jo kha chuka hai hamare shakeb aur sarwat

suKHan-kadon mein wahi harf-e-KHam chal raha hai

main jaanta hun jo na-sha’iron ki hai qimat

main jaanta hun jo in sab ka dam chal raha hai

hai sabt muhr-e-sifarish hasin jismon par

adab ki manDi mein mal-e-haram chal raha hai

tujhe KHabar nahin 'wasif' badan ke sikke ki

ai mere dost ye sikka to 'am chal raha hai