na jaane kis ne palaT kar ye di sada mujhko

na jaane kis ne palaT kar ye dī sadā mujh ko

sujhā.ī detā nahīñ aage rāsta mujh ko

maiñ us ke baare meñ sochūñ ġharaz nahīñ lekin

vo dekhne meñ to achchhā-bhalā lagā mujh ko

sitam kī nāg-phanī Das rahī thī tanhā.ī

tire baġhair akele meñ Dar lagā mujh ko

usī ke lams kī ḳhushbū basī hai sāñsoñ meñ

ai kaash vo bhī to apne meñ DhūñDhtā mujh ko

kisī bhī haal na chhūTe ye sabr kā dāman

ḳhudā-e-pāk 'atā kar vo hausla mujh ko

vo jis ko jiine kā maiñ ne shu'ūr baḳhshā thā

dikhā rahā hai vahī shaḳhs ā.īna mujh ko

har ek samt sitam Dhā rahe haiñ ibn-e-yazīd

lage hai hind bhī maidān-e-karbalā mujh ko

maiñ us ke vāste sab kuchh nisār kar detā

agar vo pyaar se 'arshad' pukārtā mujh ko

na jaane kis ne palaT kar ye di sada mujh ko

sujhai deta nahin aage rasta mujh ko

main us ke bare mein sochun gharaz nahin lekin

wo dekhne mein to achchha-bhala laga mujh ko

sitam ki nag-phani Das rahi thi tanhai

tere baghair akele mein Dar laga mujh ko

usi ke lams ki KHushbu basi hai sanson mein

ai kash wo bhi to apne mein DhunDhta mujh ko

kisi bhi haal na chhuTe ye sabr ka daman

KHuda-e-pak 'ata kar wo hausla mujh ko

wo jis ko jine ka main ne shu'ur baKHsha tha

dikha raha hai wahi shaKHs aaina mujh ko

har ek samt sitam Dha rahe hain ibn-e-yazid

lage hai hind bhi maidan-e-karbala mujh ko

main us ke waste sab kuchh nisar kar deta

agar wo pyar se 'arshad' pukarta mujh ko