نہ جانے کیا وہ درختوں سے بات کرتے رہے

نہ جانے کیا وہ درختوں سے بات کرتے رہے

کہ ڈالیوں کی لچک سے پرند ڈرتے رہے

نقوش ابھرے جو تاریکیوں کے دامن پر

خیال و خواب میں آ آ کے وہ بکھرتے رہے

تمام عمر نچوڑا کئے رگوں کا لہو

کہ ہم امیدوں کے خاکوں میں رنگ بھرتے رہے

گلوں کی طرح رہے آندھیوں کے نرغے میں

تمام زندگی ہم ٹوٹتے بکھرتے رہے

عجیب دن تھا کہ شعلے فلک اگلتا رہا

لہولہان پرندے اڑان بھرتے رہے

ہمیں تو کافی تھا شبنم کا ایک قطرہ بھی

زمانے والے پیالے لہو کے بھرتے رہے