na jaane kya wo daraKHton se baat karte rahe

na jaane kyā vo daraḳhtoñ se baat karte rahe

ki Dāliyoñ kī lachak se parind Darte rahe

nuqūsh ubhre jo tārīkiyoñ ke dāman par

ḳhayāl-o-ḳhvāb meñ aa aa ke vo bikharte rahe

tamām umr nichoḌā kiye ragoñ kā lahū

ki ham umīdoñ ke ḳhākoñ meñ rang bharte rahe

guloñ kī tarah rahe āñdhiyoñ ke narġhe meñ

tamām zindagī ham TūTte bikharte rahe

ajiib din thā ki sho.ale falak ugaltā rahā

lahūluhān parinde uḌaan bharte rahe

hameñ to kaafī thā shabnam kā ek qatra bhī

zamāne vaale piyāle lahū ke bharte rahe

na jaane kya wo daraKHton se baat karte rahe

ki Daliyon ki lachak se parind Darte rahe

nuqush ubhre jo tarikiyon ke daman par

KHayal-o-KHwab mein aa aa ke wo bikharte rahe

tamam umr nichoDa kiye ragon ka lahu

ki hum umidon ke KHakon mein rang bharte rahe

gulon ki tarah rahe aandhiyon ke narghe mein

tamam zindagi hum TuTte bikharte rahe

ajib din tha ki shoale falak ugalta raha

lahuluhan parinde uDan bharte rahe

hamein to kafi tha shabnam ka ek qatra bhi

zamane wale piyale lahu ke bharte rahe