na jaane kyon ye jahan dar-ba-dar hai kya kahiye

na jaane kyoñ ye jahāñ dar-ba-dar hai kyā kahiye

rafāqatoñ kā safar muḳhtasar hai kyā kahiye

tasavvurāt kī mahfil sajā.e baiThā huuñ

vo husn rāhat-e-qalb-o-nazar hai kyā kahiye

kisī ke ishq ne baḳhshā hai vo sukūñ mujh ko

ki ek haal meñ dil aur jigar hai kyā kahiye

sabāhatoñ kī panāhoñ meñ umr guzrī hai

ki husn-o-ishq kā ġham sar-basar hai kyā kahiye

sabā-e-nāz ne mausam kī parvarish kī hai

bisāt-e-nūr hī hadd-e-nazar hai kyā kahiye

ab aur kyā na.ī tahzīb kuchh sabaq degī

hai jis ke haath meñ ḳhanjar bashar hai kyā kahiye

'asar' vo jis kī hasīñ zulf ke asiir rahe

vo shoḳh-o-shang hī nā-mo'tabar hai kyā kahiye

na jaane kyon ye jahan dar-ba-dar hai kya kahiye

rafaqaton ka safar muKHtasar hai kya kahiye

tasawwuraat ki mahfil sajae baiTha hun

wo husn rahat-e-qalb-o-nazar hai kya kahiye

kisi ke ishq ne baKHsha hai wo sukun mujh ko

ki ek haal mein dil aur jigar hai kya kahiye

sabahaton ki panahon mein umr guzri hai

ki husn-o-ishq ka gham sar-basar hai kya kahiye

saba-e-naz ne mausam ki parwarish ki hai

bisat-e-nur hi hadd-e-nazar hai kya kahiye

ab aur kya nai tahzib kuchh sabaq degi

hai jis ke hath mein KHanjar bashar hai kya kahiye

'asar' wo jis ki hasin zulf ke asir rahe

wo shoKH-o-shang hi na-mo'tabar hai kya kahiye