na jaane sehr ye kya tu ne chashm-e-yar kiya

na jaane sehr ye kyā tū ne chashm-e-yār kiyā

ki maiñ ne hosh ke jaame ko tār-tār kiyā

fusūñ ajiib ye ai mausam-e-bahār kiyā

ki ḳhār-zār ko ham-rañg-lāla-zār kiyā

mahak rahā hai har ik gul kā jāma-e-rañgīñ

sabā ne baaġh meñ kyā zikr-e-zulf-e-yār kiyā

na pūchho pichhle pahar apnī yaad kā aalam

tumhārā zikr sitāroñ se baar baar kiyā

nasīm-e-sub.h ne aa kar vo rāgnī chheḌī

har ek phuul ne kāñTe ko jhuk ke pyaar kiyā

mire jahān-e-mohabbat meñ paḌ ga.ī halchal

sukūn-e-dil ne mujhe aur be-qarār kiyā

bhar aa.e dīda-e-anjum meñ ashk-e-majbūrī

jigar ko thaam ke jab ham ne zikr-e-yār kiyā

taḌap ke ābla-pā ek baar phir uTThe

ye kisī ne tazkira-e-āmad-e-bahār kiyā

guzar chukī haiñ jo 'ehsān' un kī mahfil meñ

unheñ qarār kī ghaḌiyoñ ne be-qarār kiyā

na jaane sehr ye kya tu ne chashm-e-yar kiya

ki main ne hosh ke jame ko tar-tar kiya

fusun ajib ye ai mausam-e-bahaar kiya

ki KHar-zar ko ham-rang-lala-zar kiya

mahak raha hai har ek gul ka jama-e-rangin

saba ne bagh mein kya zikr-e-zulf-e-yar kiya

na puchho pichhle pahar apni yaad ka aalam

tumhaara zikr sitaron se bar bar kiya

nasim-e-subh ne aa kar wo ragni chheDi

har ek phul ne kanTe ko jhuk ke pyar kiya

mere jahan-e-mohabbat mein paD gai halchal

sukun-e-dil ne mujhe aur be-qarar kiya

bhar aae dida-e-anjum mein ashk-e-majburi

jigar ko tham ke jab hum ne zikr-e-yar kiya

taDap ke aabla-pa ek bar phir uTThe

ye kisi ne tazkira-e-amad-e-bahaar kiya

guzar chuki hain jo 'ehsan' un ki mahfil mein

unhen qarar ki ghaDiyon ne be-qarar kiya