na jaane uske kitne hi sahaare sath rahte hain

na jaane us ke kitne hī sahāre saath rahte haiñ

vo paatā manzileñ jis ke sitāre saath rahte haiñ

chale jaao kahīñ lekin akele tum nahīñ hote

yaqīñ maano vahāñ ham bhī tumhāre saath rahte haiñ

kahāñ chūhā kahāñ billī kahāñ kuttā kahāñ panchhī

musībat jab paḌī ho to ye saare saath rahte haiñ

falak tum ho zamīñ ham haiñ nahīñ mumkin kabhī milnā

nadī ke bhī kahāñ donoñ kināre saath rahte haiñ

manāzir vo bhī dikhte haiñ jinheñ ho dekhnā mushkil

kahāñ ḳhush-rang har dam hī nazāre saath rahte haiñ

na samjhāo vatan kī tum taraqqī kā inheñ matlab

ye bastī hai jahāñ qismat ke maare saath rahte haiñ

akele ham raheñ phir bhī 'nazar' tanhā nahīñ hote

tumhāre ḳhvāboñ ke saa.e hamāre saath rahte haiñ

na jaane us ke kitne hi sahaare sath rahte hain

wo pata manzilen jis ke sitare sath rahte hain

chale jao kahin lekin akele tum nahin hote

yaqin mano wahan hum bhi tumhaare sath rahte hain

kahan chuha kahan billi kahan kutta kahan panchhi

musibat jab paDi ho to ye sare sath rahte hain

falak tum ho zamin hum hain nahin mumkin kabhi milna

nadi ke bhi kahan donon kinare sath rahte hain

manazir wo bhi dikhte hain jinhen ho dekhna mushkil

kahan KHush-rang har dam hi nazare sath rahte hain

na samjhao watan ki tum taraqqi ka inhen matlab

ye basti hai jahan qismat ke mare sath rahte hain

akele hum rahen phir bhi 'nazar' tanha nahin hote

tumhaare KHwabon ke sae hamare sath rahte hain