na jab tak dard-e-insan se kisi ko aagahi hogi

na jab tak dard-e-insāñ se kisī ko āgahī hogī

na paidā ishq hogā aur na dil meñ raushnī hogī

vo nikle hoñge jab sahn-e-chaman meñ be-naqāb ho kar

nazar āḳhir nazar hai be-irāda uTh ga.ī hogī

namāzī jā rahe haiñ aaj kyuuñ sū-e-sanam-ḳhāna

bahār-e-be-ḳhudī shāyad vahāñ bhī aa ga.ī hogī

na jaane dekhiye kab tak rahe mashq-e-sitam mujh par

kahāñ tak bekasī merī kisī kī dil-lagī hogī

na kar ab tazkira us bazm-e-rindāñ ke ujaḌne kā

kisī kam-zarf ke aane se mahfil uTh ga.ī hogī

hamārī ḳhāmushī kah degī afsāna zamāne kā

tumhārī guftugū mohtāj-e-sharh-e-zindagī hogī

khulegā raaz terā 'zabt' us din un kī mahfil meñ

ki jab dil kī kahānī āñsuoñ meñ Dhal ga.ī hogī

na jab tak dard-e-insan se kisi ko aagahi hogi

na paida ishq hoga aur na dil mein raushni hogi

wo nikle honge jab sahn-e-chaman mein be-naqab ho kar

nazar aaKHir nazar hai be-irada uTh gai hogi

namazi ja rahe hain aaj kyun su-e-sanam-KHana

bahaar-e-be-KHudi shayad wahan bhi aa gai hogi

na jaane dekhiye kab tak rahe mashq-e-sitam mujh par

kahan tak bekasi meri kisi ki dil-lagi hogi

na kar ab tazkira us bazm-e-rindan ke ujaDne ka

kisi kam-zarf ke aane se mahfil uTh gai hogi

hamari KHamushi kah degi afsana zamane ka

tumhaari guftugu mohtaj-e-sharh-e-zindagi hogi

khulega raaz tera 'zabt' us din un ki mahfil mein

ki jab dil ki kahani aansuon mein Dhal gai hogi