نہ جفا تم کو نہ مجھ کو ہی وفا آتی ہے

نہ جفا تم کو نہ مجھ کو ہی وفا آتی ہے

دیکھیے شرم کسے روز جزا آتی ہے

بہر سرگوشیٔ بیداد بلا آتی ہے

کان کے پاس تری زلف دوتا آتی ہے

بیکسی باعث شرمندگیٔ مرگ ہوئی

گور کو بھی مرے لینے میں حیا آتی ہے

کھینچے ہے ناقۂ لیلیٰ کو سوئے نجد کوئی

سارباں نالۂ مجنوں کی صدا آتی ہے

سرد مہری سے تری داغ جگر سبز ہوئے

روزن سینہ سے کچھ ٹھنڈی ہوا آتی ہے

ہائے وہ گریۂ خاموش سے بھی گرم ہوئے

اشک غماز کو کیا آگ لگا آتی ہے

کس کے تلووں سے تصور میں ملی تھیں آنکھیں

اشک خوں بار سے کچھ بوئے حنا آتی ہے

ہاتھ جب سینہ کے ناسور سے اپنا سرکا

دل بیمار پکارا کہ ہوا آتی ہے

شعلہؔ ہے الفت دنیا تو فقط تا دم مرگ

زندگی یاد کسے بعد فنا آتی ہے