na jazbon mein koi shiddat na girai na gahrai

na jazboñ meñ koī shiddat na gīrā.ī na gahrā.ī

faqat lafzoñ kī baisākhī pe hai saarī shanāsā.ī

ba-zāhir dekhne meñ yuuñ to haiñ ik jaan do qālib

haqīqat meñ haiñ donoñ hī asīr-e-ranj-e-tanhā.ī

zabān-e-mudda.ā hai jur.at-e-iz.hār se qāsir

ki in āñkhoñ meñ dekhā ham ne aksar ḳhauf-e-rusvā.ī

bhaTaktā phir rahā huuñ maiñ savād-e-dasht-e-zulmat meñ

nazar aatā nahīñ rasta basīrat hai na bīnā.ī

ruḳh-e-raushan pe parda kab talak ai husn-e-ḳhud-ārā

zarā parde se bāhar aa ki aalam hai tamāshā.ī

junūn-e-ḳhud-numā.ī ibtizāl-e-ilm-o-hikmat hai

ki har ik mubtadī kartā hai ḳhud apnī pazīrā.ī

'shakīl-e-maz.harī' aisī ġhazal kahne se kyā hāsil

taḳhayyul meñ koī nudrat na sheroñ meñ hai ra.anā.ī

na jazbon mein koi shiddat na girai na gahrai

faqat lafzon ki baisakhi pe hai sari shanasai

ba-zahir dekhne mein yun to hain ek jaan do qalib

haqiqat mein hain donon hi asir-e-ranj-e-tanhai

zaban-e-muddaa hai jurat-e-izhaar se qasir

ki in aankhon mein dekha hum ne aksar KHauf-e-ruswai

bhaTakta phir raha hun main sawad-e-dasht-e-zulmat mein

nazar aata nahin rasta basirat hai na binai

ruKH-e-raushan pe parda kab talak ai husn-e-KHud-ara

zara parde se bahar aa ki aalam hai tamashai

junun-e-KHud-numai ibtizal-e-ilm-o-hikmat hai

ki har ek mubtadi karta hai KHud apni pazirai

'shakil-e-mazhari' aisi ghazal kahne se kya hasil

taKHayyul mein koi nudrat na sheron mein hai ranai