na jis mein hadse gham ke hon zindagi ke liye

na jis meñ hādse ġham ke hoñ zindagī ke liye

vo zindagī to musībat hai aadmī ke liye

o be-niyāz mire kuchh ḳhabar bhī hai tujh ko

miTā rahā huuñ maiñ ḳhud ko tirī ḳhushī ke liye

havas-parast nahīñ banda-e-ḳhulūs huuñ maiñ

jo merā apnā ho maiñ bhī huuñ bas usī ke liye

ḳhudā kī den hai vo jis ko daulat-e-ġham de

ki faiz-e-ishq nahīñ hai ye har kisī ke liye

bas ik nigāh-e-tamannā-navāz ho jaa.e

taras gayā huuñ mohabbat kī zindagī ke liye

zahe nasīb ki aa.ī to un ke hoñToñ par

tamām umr maiñ royā thā jis hañsī ke liye

ye apnā apnā muqaddar hai apnā apnā nasīb

ki ġham kisī ke liye hai ḳhushī kisī ke liye

kahāñ vo lazzat-e-paiham ki ab to zālim ne

uThā rakhī haiñ jafā.eñ kabhī kabhī ke liye

rakhā na vahshat-e-dil ne kahīñ kā ai 'sāhir'

na koī mere liye hai na maiñ kisī ke liye

na jis mein hadse gham ke hon zindagi ke liye

wo zindagi to musibat hai aadmi ke liye

o be-niyaz mere kuchh KHabar bhi hai tujh ko

miTa raha hun main KHud ko teri KHushi ke liye

hawas-parast nahin banda-e-KHulus hun main

jo mera apna ho main bhi hun bas usi ke liye

KHuda ki den hai wo jis ko daulat-e-gham de

ki faiz-e-ishq nahin hai ye har kisi ke liye

bas ek nigah-e-tamanna-nawaz ho jae

taras gaya hun mohabbat ki zindagi ke liye

zahe nasib ki aai to un ke honTon par

tamam umr main roya tha jis hansi ke liye

ye apna apna muqaddar hai apna apna nasib

ki gham kisi ke liye hai KHushi kisi ke liye

kahan wo lazzat-e-paiham ki ab to zalim ne

uTha rakhi hain jafaen kabhi kabhi ke liye

rakha na wahshat-e-dil ne kahin ka ai 'sahir'

na koi mere liye hai na main kisi ke liye