na kah ki arz-e-wafa ka koi sila na mila

na kah ki 'arz-e-vafā kā koī sila na milā

agar mazāq-e-vafā bhī milā to kyā na milā

kisī kī jur.at-e-rindāna kaañp kaañp uThī

jab un kī mast nigāhoñ kā aasrā na milā

maiñ ab muzāhira-e-zauq-e-naġhma kyā kartā

ki is chaman meñ mujhe koī ham-navā na milā

tire nisār tire ġham kī sozishoñ ke nisār

mire sukūn kā kyā hai milā milā na milā

ab us ke dil kī tamanna ko koī kyā jaane

jise bahāna-e-iz.hār-e-mudda'ā na milā

vo be-ḳhudī-e-mohabbat kī āḳhirī had thī

jahāñ pahuñch ke mujhe bhī mirā patā na chalā

mujhe junūn-e-mohabbat kī vādiyoñ meñ 'hazīñ'

nishān-e-sajda to kyā koī naqsh-e-pā na milā

na kah ki 'arz-e-wafa ka koi sila na mila

agar mazaq-e-wafa bhi mila to kya na mila

kisi ki jurat-e-rindana kanp kanp uThi

jab un ki mast nigahon ka aasra na mila

main ab muzahira-e-zauq-e-naghma kya karta

ki is chaman mein mujhe koi ham-nawa na mila

tere nisar tere gham ki sozishon ke nisar

mere sukun ka kya hai mila mila na mila

ab us ke dil ki tamanna ko koi kya jaane

jise bahana-e-izhaar-e-mudda'a na mila

wo be-KHudi-e-mohabbat ki aaKHiri had thi

jahan pahunch ke mujhe bhi mera pata na chala

mujhe junun-e-mohabbat ki wadiyon mein 'hazin'

nishan-e-sajda to kya koi naqsh-e-pa na mila