na kaliyan muskuraati hain na phulon par nikhaar aae

na kaliyāñ muskurātī haiñ na phūloñ par nikhār aa.e

baḌī be-kaifiyoñ ke saath ayyām-e-bahār aa.e

koī qīmat nahīñ aise vafā ke ahd-o-paimāñ kī

mujhe jis par yaqīñ aa.e na un ko e'tibār aa.e

jahāñ ke chappe chappe par gumāñ hotā thā manzil kā

mirī manzil meñ aise marhale bhī be-shumār aa.e

haqīqat us ke dil se pūchhiye jazb-e-mohabbat kī

samajh meñ jis ke mafhūm-e-nigāh-e-sharmsār aa.e

nizām-e-gulsitāñ zarf-e-tamannā se ibārat hai

tire dāman meñ phuul aa.e mire dāman meñ ḳhaar aa.e

marīz-e-ġham ke lab par naam un kā baar baar aayā

phir us ke ba.ad chārasāz aa.e ġham-gusār aa.e

'nasīr' aayā tavāf-e-kū-e-jānāñ raas kab dil ko

tamannā-e-sukūñ le kar ga.e aur be-qarār aa.e

na kaliyan muskuraati hain na phulon par nikhaar aae

baDi be-kaifiyon ke sath ayyam-e-bahaar aae

koi qimat nahin aise wafa ke ahd-o-paiman ki

mujhe jis par yaqin aae na un ko e'tibar aae

jahan ke chappe chappe par guman hota tha manzil ka

meri manzil mein aise marhale bhi be-shumar aae

haqiqat us ke dil se puchhiye jazb-e-mohabbat ki

samajh mein jis ke mafhum-e-nigah-e-sharmsar aae

nizam-e-gulsitan zarf-e-tamanna se ibarat hai

tere daman mein phul aae mere daman mein KHar aae

mariz-e-gham ke lab par nam un ka bar bar aaya

phir us ke baad chaarasaz aae gham-gusar aae

'nasir' aaya tawaf-e-ku-e-jaanan ras kab dil ko

tamanna-e-sukun le kar gae aur be-qarar aae