na kar talash-e-asar tir hai laga na laga

na kar talāsh-e-asar tiir hai lagā na lagā

jo apne bas kā nahīñ us kā aasrā na lagā

hayāt lazzat-e-āzār kā hai dūsrā naam

namak chhiḌak to chhiḌak zaḳhm par davā na lagā

mire ḳhayāl kī duniyā meñ is jahāñ se duur

ye baiThe baiThe huā gum ki phir patā na lagā

ḳhushī ye dil kī hai is meñ nahīñ hai aql ko daḳhl

burā vo kahte rahe aur kuchh burā na lagā

chamak se barq kī kam-tar hai vaqfa-e-dīdār

nazar haTī ki use haath ik bahāna lagā

mirī talāsh thī tashvīsh-e-dīda-e-be-nūr

vo milte kyā mujhe apnā hī jab patā na lagā

na kar talash-e-asar tir hai laga na laga

jo apne bas ka nahin us ka aasra na laga

hayat lazzat-e-azar ka hai dusra nam

namak chhiDak to chhiDak zaKHm par dawa na laga

mere KHayal ki duniya mein is jahan se dur

ye baiThe baiThe hua gum ki phir pata na laga

KHushi ye dil ki hai is mein nahin hai aql ko daKHl

bura wo kahte rahe aur kuchh bura na laga

chamak se barq ki kam-tar hai waqfa-e-didar

nazar haTi ki use hath ek bahana laga

meri talash thi tashwish-e-dida-e-be-nur

wo milte kya mujhe apna hi jab pata na laga